ပြည်တွင်းပြည်ပမှာရှိသော မြန်မာတိုင်းရင်းသား ညီအစ်ကိုမောင်နှမအားလုံး အေးချမ်းသာယာပြီးခေတ်မီဖွံ့ဖြိုးတိုးတက်သော စည်းကမ်းပြည့်ဝသည့် ဒီမိုကရေစီ နိုင်ငံတော်သစ်တည်ဆောက်ရာမှာ မိမိအခန်းကဏ္ဍအလိုက် တာဝန်ကျေစွား၊ စည်းလုံးညီညွတ်စွာ လက်တွဲဆောင်ရွက်ကြပါစို့

Friday, June 08, 2012

ဇွန် ၁ ရက်မှ စပြီး နိုင်ငံပေါင်း ၂၇ နိုင်ငံအား ရန်ကုန် လေဆိပ်တွင် ဆိုက်ရောက်ဗီဇာသုံးမျိုး ထုတ်ပေးမည်



From : ဇော်ဝင်းသန်းနှင့် ယုယုမော်
မြန်မာတိုင်း၊ အတွဲ ၂၉ ၊ အမှတ် ၅၇၁ (၁ - ၇ ၊ ၆ ၊ ၂၀၁၂)
ဇွန် ၁ ရက်မှစတင်ပြီး နိုင်ငံပေါင်း ၂၇ နိုင်ငံမှ ဧည့်သည်များအတွက် လုပ်ငန်း၊ ပြည်ဝင်ခွင့်နှင့် ဖြတ်သန်းဗီဇာ သုံးမျိုးကို ရန်ကုန် အပြည်ပြည်ဆိုင်ရာ လေဆိပ် တစ်ခုတည်းတွင် ဆိုက်ရောက်ဗီဇာ စတင်ထုတ်ပေးသွားမည်ဟု လူဝင်မှု ကြီးကြပ်ရေးနှင့် အမျိုးသား မှတ်ပုံတင် ရေးဦးစီးဌာနမှ ညွှန်ကြားရေးမှူးချုပ် ဦးမောင်မောင်သန်းက မေလ ၂၈ ရက်နေ့ က ရန်ကုန်တိုင်း အစိုးရအဖွဲ့ရုံးတွင် ကျင်းပပြုလုပ်သည့် သတင်းစာရှင်းလင်း ပွဲတွင် ပြောကြားသည်။

"ဇွန်လ ၁ ရက်နေ့ကနေစပြီး လုပ်ငန်း၊ ပြည်ဝင်ခွင့်နဲ့ ဖြတ်သန်းဆိုက်ရောက် ဗီဇာတွေကို ရန်ကုန်အပြည်ပြည်ဆိုင်ရာ လေဆိပ် တစ်ခုတည်းမှာပဲ စထုတ်ပေး မှာဖြစ်ပါတယ်။ နောက်ပိုင်းမှာတော့ မန္တလေးနဲ့ နေပြည်တော်လေဆိပ်တွေမှာ တိုးချဲ့ထုတ်ပေးဖို့ ရှိပါတယ်။ လောလော ဆယ် ခရီးသွားဧည့်သည်တွေကိုတော့ ထုတ်ပေးဖို့ မရှိသေးပါဘူး" ဟု ဦးမောင်မောင်သန်းက ပြောသည်။
ယခုခွင့်ပြုပေးမည့် အဓိက ဆိုက် ရောက်ဗီဇာအမျိုးအစားမှာ လုပ်ငန်း ဗီဇာနှင့် ပြည်ဝင်ခွင့်ဗီဇာ နှစ်မျိုးသာဖြစ် ပြီး ဖြတ်သန်းဗီဇာ ကိုလည်း ထည့်သွင်း ထားခြင်းဖြစ်သည်။
"အခု ဒီဗီဇာအမျိုးအစားတွေပဲ ထုတ် ပေးရတာကလည်း ကျွန်တော်တို့ရဲ့ လေဆိပ်က နိုင်ငံတကာ မြို့ပြလေကြောင်း လုံခြုံရေး အဖွဲ့ရဲ့ သတ်မှတ်ထား တဲ့ စံနှုန်းအတိုင်း လိုက်နာဆောင်ရွက် ရတာ ဖြစ်ပါတယ်။ အားလုံးကို ချက်ချင်း ထုတ်ပေးလိုက်ရင် ဒီမှာခရီးသည်တွေက ဗီဇာမယူဘဲ စုပုံရောက်လာမယ်ဆို လေဆိပ်ရောက်မှ စစ်ဆေးရတာဖြစ်တဲ့ အတွက် ပိုပြီးကြန့်ကြာနိုင်တယ်။ တကယ်လို့ ရောက်လာတဲ့ခရီးသည်က ပြည်ဝင်ခွင့်ပေးလို့မရတဲ့ ကန့်သတ်ထား သူဆို သူစီးလာတဲ့လေယာဉ်နဲ့ ပြန်ပို့ဖို့ က နောက် ကျလို့လည်း မဖြစ်ပါဘူး။ အခု ဆို လေဆိပ်မှာ တစ်နေ့ကို နိုင်ငံခြားသား ခရီးသည် ၁,၅၀၀ လောက် ၀င်ပါတယ်။ လက်ရှိ လေဆိပ် အခြေအနေအရ အကုန်လုံးကိုသာ ဆိုက်ရောက်ဗီဇာယူ မယ်ဆို လေဆိပ်မှာ ခရီးသည်တွေ တန်းစီ တာများသွားမှာကိုလည်း ကျွန်တော်တို့ သတိထားပါတယ်။ ဒါကြောင့် နောင်မှာ လည်း အွန်လိုင်းကနေ အီး-ဗီဇာ လျှောက် ထားဖို့လည်း ဆက်ပြီးစီစဉ် နေပါတယ်။ အွန်လိုင်းကနေလုပ်ပေးလို့ အဆင်ပြေပြီ ဆို နောက်ပိုင်း အကုန်လုံးကို ဆက်ပြီး ဖွင့်ပေးသွားမှာ ဖြစ်ပါတယ်"ဟု ၎င်းက ဆက်ပြောသည်။
လုပ်ငန်းဆိုက်ရောက်ဗီဇာမှာ အမေ ရိကန်ဒေါ်လာ ၅၀ ဖြစ်ပြီး ရက်ပေါင်း ၇၀ နေထိုင်ခွင့်ရမည်ဖြစ်ကာ ပြည်ဝင်ခွင့် ဗီဇာမှာ အမေရိကန်ဒေါ်လာ ၄၀ နှင့် နေထိုင်ခွင့် ၂၈ ရက်သာ ရမည်ဖြစ်သည်။
ထို့ပြင် ဖြတ်သန်းဆိုက်ရောက်ဗီဇာအား အမေရိကန်ဒေါ်လာ ၂၀ ကောက်ခံကာ မြို့တွင်း၂၄ နာရီ အထိသာ လည်ပတ်ခွင့် ပြုမည်ဖြစ်သည်။
ခွင့်ပြုမည့်နိုင်ငံများတွင် အာဆီယံ အဖွဲ့ဝင်နိုင်ငံများဖြစ်သည့် ဘရူနိုင်း၊ ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ ဖိလစ်ပိုင်၊ စင်ကာပူ၊ ထိုင်း၊ ဗီယက်နမ်အပြင် ဩစတြေးလျ၊ တရုတ်၊ ဒိန်းမတ်၊ ပြင်သစ်၊ ဂျာမနီ၊ အိန္ဒိယ၊ အီတလီ၊ ဂျပန်၊ တောင်ကိုရီးယား၊ မြောက် ကိုးရီးယား၊ နယူးဇီလန်၊ နော်ဝေ၊ စပိန်၊ ဆွီဒင်၊ ဆွစ်ဇာလန်၊ ထိုင်ဝမ်၊ ဗြိတိန်နှင့် အမေရိကန်ပြည်ထောင်စုတို့ ပါဝင် သည်။
ပြည်ဝင်ခွင့် ဆိုက်ရောက်ဗီဇာဖြင့် အစည်းအဝေး၊ အလုပ်ရုံဆွေးနွေးပွဲများ၊ တွေ့ဆုံပွဲများ၊ အခမ်းအနားတက်ရောက် မည့်သူများ ဖြစ်ပါက သက်ဆိုင်ရာဝန်ကြီး ဌာနများမှ ဖိတ်ကြားစာ ပူးတွဲတင်ပြရ မည်ဖြစ်သည်ဟု ၎င်းက ပြောသည်။
အလားတူ အစိုးရအဖွဲ့၏ တည်ဆဲ ဥပဒေ၊ နည်းဥပဒေ၊ လုပ်ထုံးလုပ်နည်း၊ အမိန့်နှင့် ညွှန်ကြားချက်အားလုံးကို တိကျစွာ လိုက်နာ မည်ဖြစ်ကြောင်း ၀န်ခံ ကတိပြုရမည်ဟု ဦးမောင်မောင်သန်းက ပြောသည်။
မိဘ၏ နိုင်ငံကူးလက်မှတ်နှင့် ပူးတွဲပါ ရှိသော အသက်ခုနစ်နှစ်အောက် ကလေးများကို အခမဲ့ပြည်ဝင်ခွင့်ပြုမည် ဖြစ်ကာ သီးခြား နိုင်ငံကူးလက်မှတ်ကိုင် ဆောင်ထားသည့် အသက်ခုနစ်နှစ် အောက် ကလေးကိုမူ ခေါ်ဆောင်လာသူ ၏ သား၊ သို့မဟုတ် သမီး ဖြစ်ကြောင်း အထောက်အထား တင်ပြနိုင်ရမည် ဖြစ်သည်။
ထို့ပြင် ကန့်သတ်နယ်မြေများသို့ ကြိုတင်ခွင့်ပြုချက်မပါရှိဘဲ သွားရောက် ခြင်းမပြုရန် သတ်မှတ်ထားသည်။
သို့သော် ပြည်ဝင်ခွင့်မပြုကြောင်း ဆုံးဖြတ်ခံရပါက မူလလိုက်ပါလာသည့် လေကြောင်းလိုင်း အစီအစဉ်ဖြင့် ထွက်ခွာလာသည့် နိုင်ငံသို့ ပြန်လည် ထွက်ခွာရမည်ဖြစ်သည်။
ဆိုက်ရောက်ဗီဇာ လျှောက်လွှာပုံစံကို လေကြောင်းလိုင်းများတွင် လည်း ကောင်း၊ လူဝင်မှုကြီးကြပ်ရေးနှင့် ပြည်သူ့ အင်အားဝန်ကြီး ဌာန၏ ၀က်ဘ်ဆိုက်ဖြစ် သော www.mip.gov.mm တွင်လည်း ကောင်း ထုတ်ယူပြီး ရန်ကုန်အပြည်ပြည် ဆိုင်ရာလေဆိပ်ရှိ လူဝင်မှုကြီးကြပ်ရေး ဌာနတွင် တင်ပြလျှောက်ထားနိုင် သည်။
"ကျွန်တော်တို့က ဒီစနစ်ကို စမ်းသပ် ကာလရယ်လို့ မသတ်မှတ်ထားပါဘူး။ ဒီစနစ်အပေါ်မှာ ချိန်ပြီးတော့မှ လိုအပ်တဲ့ စက်ပစ္စည်း ကိရိယာတွေ၊ နည်းပညာ တွေ ထပ်ဖြည့်ပြီး နောက်ပိုင်း လက်ရှိနိုင်ငံ တွေအပြင် တခြားနိုင်ငံတွေကိုလည်း ဆိုက်ရောက်ဗီဇာ ထုတ်ပေးဖို့ရှိပါတယ်" ဟု ဦးမောင်မောင်သန်းက ပြောသည်။
ဆိုက်ရောက်ဗီဇာစနစ် ပြောင်းလဲ ကျင့်သုံးရေးမူဝါဒကို ဧပြီလ ၃၀ ရက်နေ့ က ပြည်ထဲရေးဝန်ကြီးဌာနတွင် ကျင်းပ ပြုလုပ်ခဲ့သည့် မြန်မာနိုင်ငံ၏ ဆိုက် ရောက်ဗီဇာစနစ်ပြောင်းလဲ ကျင့်သုံးရေး ဆိုင်ရာ အစည်းအဝေးမှ ဆုံးဖြတ်ခဲ့ခြင်း ဖြစ်ပြီး အဆိုပါအစည်းအဝေး ၏မူဝါဒ ဆိုင်ရာ ဆုံးဖြတ်ချက်အရ မေလ ၁ ရက် နေ့မှစတင်ပြီး ရန်ကုန်နှင့် မန္တလေး အပြည်ပြည်ဆိုင်ရာ လေဆိပ်တို့တွင် စတင် ထုတ်ပေး ခဲ့ခြင်းဖြစ်သည်။
၂၀၁၀ ပြည့်နှစ်၊ ဧပြီလ ၃၀ ရက်နေ့ ပြည်ထဲရေးဝန်ကြီးဌာနတွင် ကျင်းပပြု လုပ်ခဲ့သည့် မြန်မာနိုင်ငံ၏ ဆိုက်ရောက် ဗီဇာစနစ် ပြောင်းလဲကျင့် သုံးရေးဆိုင်ရာ အစည်းအဝေးမှ ဆုံးဖြတ်ချက်အရ အဆိုပါနှစ် မေလ ၁ ရက်နေ့မှစတင်ခါ မည်သည့်နိုင်ငံသားမဆို လျှောက်ထား နိုင်သော ဆိုက်ရောက်ဗီဇာစနစ်ကို ရန်ကုန်နှင့် မန္တလေးအပြည်ပြည်ဆိုင်ရာ လေဆိပ်တို့တွင် စတင်ထုတ်ပေးခဲ့ သည်။
သို့သော် လေးလအကြာ စက်တင်ဘာ လ ၁ ရက်နေ့မှစတင်၍ အဆိုပါစနစ်အား ပြန်လည်သုံးသပ်ရန်အလို့ငှာ ဆိုက် ရောက်ဗီဇာ ထုတ်ပေးသည့်စနစ်ကို ရပ်တန့်လိုက်သည်။
"အခုက စနစ်သစ်ဖြစ်ပေမယ့် နဂိုရှိပြီး သားစနစ်တွေကိုလည်း အရင်အတိုင်း ဆက်လက်ပေးသွားမှာပါ။ အခုစာရင်း မှာမပါတဲ့ နိုင်ငံတွေက ဧည့်သည်တွေ အနေနဲ့ အရင်အတိုင်း သက်ဆိုင်ရာ နိုင်ငံ ခြားတိုင်းပြည်တွေက မြန်မာသံရုံးက တစ်ဆင့် လျှောက်ထား ရယူနိုင်ပါတယ်"ဟု ညွှန်ကြားရေးမှူးချုပ် ဦးမောင်မောင် သန်းက ပြောသည်။
လက်ရှိ ဆိုက်ရောက်ဗီဇာစနစ်ကို အပြည်ပြည်ဆိုင်ရာ မြန်မာ့လေကြောင်း (အမ်အေအိုင်)၏ ကမ္ဘောဒီးယားနိုင်ငံ ဖနွမ်းပင်မြို့၊ ဆီယမ်ရိမြို့နှင့် တရုတ်နိုင်ငံ ကွမ်ကျိုးမြို့တို့မှ စီးနင်းလိုက်ပါလာ သည့် မည်သည့်နိုင်ငံသားမဆို ဆိုက် ရောက်ဗီဇာ ထုတ်ပေးနေ သေးသည်။

No comments:

Post a Comment